പ-മ

1061. പകലെല്ലാം ചിരിച്ചുനടക്കും
രാത്രിയായാൽ കടലിൽ ചാടും
♥സൂര്യൻ

1062. പകലെല്ലാം തൂങ്ങീതൂങ്ങി
രാത്രിമുഴുവൻ താങ്ങിതാങ്ങി
♥സാക്ഷ

1063. പകൽവെളുപ്പും രാത്രികറുപ്പും
♥സൂര്യൻ

1064. പകലെല്ലാം പച്ചക്കായ
രാത്രിയായാൽ പഴുത്തകായ
♥ബൾബ്

1065. പകലെല്ലാം പൊത്തും പിടിയും
രാത്രിയായാൽ കൂട്ടിമുത്തും
♥കൺപോളകൾ

1066. പകലെല്ലാം വെറുകായ്
രാത്രിയായാൽ വിളങ്ങുംകായ്
♥ബൾബ്

1067. പങ്കിക്കുട്ടൻ കാവൽക്കാരൻ
♥സാക്ഷ

1069. പച്ചക്കാട്ടിൽ തവിട്ടുകൊട്ടാരം
അതിനുള്ളിൽ വെളളകൊട്ടാരം
അതിനുള്ളിൽ കൊച്ചുതടാകം
♥തേങ്ങ

1070. പച്ചക്കുടയും പവിഴക്കുലയും വെള്ളത്തണ്ടും
♥കവുങ്ങ്
1071. പച്ചകൂട്ടിൽ വെള്ളിക്കാശ്
♥പച്ചമുളക്

1072. പച്ചകൊട്ടാരത്തിൽ പല്ലിമുട്ട
♥അടയ്ക്കാക്കുല

1073. പച്ചപ്പത്തായത്തിൽ പല്ലിമുട്ട
♥പപ്പായ

1074. പച്ചക്കൊരു ട്ടൈ, ചുട്ടാൽ ഒരു കൊട്ട
♥പപ്പടം

1075. പച്ചച്ചള്ള മുരിക്കിൻപെട്ടി
പെട്ടിനിറച്ചും ചപ്പും ചവറും
ചപ്പിനകത്തുനിറച്ചും കുപ്പി
കുപ്പിയിലൊക്കെയൊരേഗുളിക
♥ചക്ക

1076. പച്ചപ്പച്ചക്കിളി, കൊമ്പിലിരിക്കും കിളി
കൂകൂ മാട്ടേൻ കിളി
♥മാങ്ങ

1077. പച്ചപട്ടുടുത്ത് പാതിപ്പട്ടുതൊങ്ങലിട്ടു
മുത്തുമുത്തുകുടപിടിച്ച് മൂവായിരം പിള്ളേരെ പെറ്റു
♥കുലച്ചുനിൽക്കുന്ന ഉലട്ടിപ്പന

1078.പച്ചപ്പട്ടുത്തെത്തൈ
പന്തുരുട്ടി തെത്തൈ
കോണകവാല് തെത്തൈ
തൊട്ടുനക്കി തെത്തൈ. 
♥അടയ്ക്ക, പുകയില, ചുണ്ണാമ്പ്

1079. പച്ചപ്പന്തലിട്ട്, പതിനാറുതൊങ്ങലിട്ട്
മുത്തുക്കുട പിടിച്ച്, മുന്നൂറുകായകായ്ച്ചു
♥കവുങ്ങ്

1080. പച്ചപ്പന്തലിട്ട്, പവിഴമാലഞാത്തുമിട്ട്
ആയിരം കായും കായ്ച്ചു
♥മുളക്

1081. പച്ചപ്പലക കൊട്ടാരത്തിൽ
പത്തുംനൂറും കൊട്ടത്തേങ്ങ
♥പപ്പ്ക്കായ

1082. പച്ചബസ്സ്, ചുവന്നസീറ്റ്, കറുത്ത ആൾക്കാർ
♥തണ്ണിമത്തൻ

1083. പച്ചയിറച്ചിയിന്മേൽ ഫലംതൂങ്ങി
♥കാതിൻതോട

1084. പഞ്ചപാണ്ഡവന്മാരഞ്ചുപേർക്കും കൂടി
ഒരു മുറ്റമേയുള്ളൂ വീടില്ല
♥കൈപ്പടം

1085. പട്ടുസഞ്ചിയിൽ പവൻകാശ്
♥വറ്റൽമുളക്

1086. പട്ടുടുത്തു കിണറ്റിൽച്ചാടി
♥കാച്ചിൽ

1087. പതയുണ്ട് പാലല്ല, പുളിയുണ്ട് മോരുമല്ല
♥കള്ള്

1088.പത്തായവയറൻ ശാപ്പാട്ടുരാമൻ
പള്ളയ്ക്കടിച്ചാൽ കുപ്പയിൽ വാസം
♥കലം

1089. പത്തും നൂറും കൊട്ടത്തേങ്ങ
♥പപ്പായ

1090. പനയിലായിരം, ചുവട്ടിലായിരം
തോട്ടത്തിലായിരം, തോട്ടിലായിരം
♥പനകുരു, വേര്, പൂവ്, മത്സ്യം

1091. പന്തിനുള്ളിൽ പെട്ടി
പെട്ടിക്കുള്ളിൽ കുട്ടി
♥മാങ്ങ

1092. പപ്പടചേട്ടനുറങ്ങാനായ്
ഒന്നുരണ്ടായിരം മൈൽ കിടക്ക
♥ചന്ദ്രനും ആകാശവും

1093. പലകക്കീഴെ പച്ചയിറച്ചി
♥നഖം

1094. പല്ലില്ലാക്കാള പുല്ലെല്ലാംതിന്നു
♥പുല്ലരിയുക

1095. പള്ളക്കുകാലാ, മുതുകത്തുകണ്ണാ
ഉളളംകൈ മൂക്കനാർ വരവുണ്ടെന്നുകേട്ടു
ആരുപറഞ്ഞെട ചെരവക്കഴുത്താ
വയറ്റിൽ കുടലില്ലാത്ത അണ്ണാന്മാർ പറഞ്ഞു
♥ചെണ്ട

1096. പള്ളേൽകണ്ണൻ കള്ളംപറയില്ല
♥ക്യാമറ

1097. പള്ളേൽപിടിച്ചു മണ്ടേലൂതുമ്പോൾ
നാട്ടാരെല്ലാമെഴുന്നേറ്റു തൊഴും
♥ശംഖ്

1098. പഴുപ്പനച്ഛന്റെ വായിൽ വളഞ്ഞ
മോൻ തൂങ്ങിക്കിടക്കുന്നു. പറങ്കിമാങ്ങയണ്ടി
1099. പറമ്പത്തെചട്ടിക്കു മൂടില്ല
♥കിണറ്

1100. പറമ്പുവെളുത്തത്, വിത്തുകനത്ത്
വാ കൊണ്ടുവിരിക്കും കൈകൊണ്ടറുക്കും
♥പുസ്തകവായനയും എഴുത്തും